MERGÚLLATE NO OUTONO CON ESTES LIBROS!

Queridos e queridas:

Esta noite, cando deron as 2:05 da madrugada e a maioría durmiamos tranquilamente nas nosas camiñas, deu comezo o outono astronómico. Ou polo menos, iso din os cálculos do Observatorio Astronómico Nacional.

Temos por diante case noventa días, ata o vindeiro 21 de decembro, para podermos mergullarnos nas historias máis incribles que nos esperan nos estantes da BiblioAntioquía.

Porque, pensa: pode haber mellor plan para unha tarde de chuvia que a túa manta preferida e unha novela da que non poidas despegar os ollos?

Por se precisases algunha axudiña á hora de escoller os libros cos que encher estes días outonais, desde a BiblioAntioquía queremos facerche as nosas recomendacións. Hai un pouco de todo: acción, distopía, misterio, fantasía, historia, cómic, amizade, amor... Así que seguro que atopas algún que che apeteza levar contigo.

Aí van! Son para todos os gustos!

ABRIMOS UNHA FIESTRA Á BIBLIOANTIOQUÍA!

Este curso estreamos o noso boletín mensual de noticias: «Unha fiestra á BiblioAntioquía». Co obxectivo de que as familias non perdan ningunha das actividades nas que participa o alumnado e o profesorado na nosa biblioteca escolar, a partir desta mesma semana compartiremos, cada mes, todas as novidades da BiblioAntioquía.

Neste primeiro número, correspondente ao mes de setembro, destacamos a invitación ás familias para que se unan ao Club de Lectura «Ao pé da letra» de adultos. Se vos gusta ler, non o dubidedes e enviade un correo electrónico a anabel_figueira@edu.xunta.gal. Estamos agardando por vós!

No seguinte enlace podedes consultar esta primeira edición do boletín, que a partir de agora recibiredes a través da mensaxería de Abalar.

👉 ENLACE AO BOLETÍN: https://boletinbiblioantioquia.my.canva.site/

COMPARTE OS TEUS TALENTOS CO MUNDO! ÚNETE AO VOLUNTARIADO DA BIBLIOANTIOQUÍA

Este curso 2026/2027 vai arrancando pouco a pouco e na BiblioAntioquía estamos preparando unha programación á altura das circunstancias, destes novos comezos e de usuarios e usuarias tan esixentes coma vós. Pero, para poder ofrecervos as mellores actividades, imos necesitar da vosa axuda. Buscamos “profes” que nos axuden a impartir obradoiros. Escoita...

Se tes algunha habilidade, como o crochet, as manualidades, o debuxo ou calquera outra cousa que se che dea ben... e queres compartila co mundo, aquí es máis que benvido ou benvida. Encantaríanos contar contigo no equipo da BiblioAntioquía e ofrecer os teus talentos ao resto do alumnado. Se queres impartir algún obradoiro como profe ou ben asistir como alumnado, non dubides en preguntar na biblio!

COMEZA O CURSO... ¡E TAMÉN OS CLUBS DE LECTURA!

Desde a BiblioAntioquía queremos darvos a benvida a todos os membros da comunidade educativa que nos incorporamos esta mañá ás aulas despois do merecido descanso. A pesar de que o verán rematou, foi marabilloso e un motivo de moita ledicia tervos a todos e todas de volta no IES.

E como non pode ser doutra maneira, na BiblioAntioquía tamén nos imos a poñer a funcionar...¡pero xa! Arrancamos lembrándovos que temos Clubs de Lectura para o alumnado da ESO e Bacharelato (aos que dividiremos en dous grupos) e outro para persoas adultas, onde o resto seredes máis que ben recibidos.

Se vos intriga ou vos interesa isto dos Clubs, nos que, ademais de botar unha boa parolada sobre o que vaiamos lendo, tampouco faltarán lambetadas nin regaliños de vez en cando, xa vos podedes ir anotando. Lembrade que temos tres:

• Un para 1º, 2º e 3º da ESO 

• Outro para 4º da ESO, 1º e 2º de BAC

• E tamén o de persoas adultas!

Unirse é moi fácil. As profes da Biblio irán preguntando polas aulas. E tamén vos podedes achegar vós ata alí, ¡¡que non mordemos!!

¡¡Animádevos!!

TODO O MUNDO A FARMEAR AURA ACADÉMICA NA BIBLIOANTIOQUÍA!

 

Benvidos e benvidas á biblioteca, bros and sis, o spot definitivo para subir o nivel e non quedar stuck no ciclo de estudiar á última hora neste novo curso que comezamos. 

Sabemos que ás veces entrar aquí pode dar un pouco de cringe se tes a idea de que é un lugar aburrido, pero nada que ver. Aquí podes concentrarte nos teus proxectos para que non sexan mid e así  farmear aura académica. Se es dos que cree que aprobar sen abrir un libro é posible, pois …stay delulu, porque aquí temos todo o gear necesario (libros, Wi-Fi e silencio real) para que non entres en modo pánico antes dos exames.

Así, que solta o móbil un rato, agarra un libro e fai que o teu rendemento brille. Que esta visita sexa o main character moment deste curso! Estamos para calquera dúbida que teñades, así que preguntade sen medo. A darlle con todo!

P.D. Non pensedes que o equipo da biblio toleou...Pero fixemos os deberes este verán para ver se vos damos entendido dunha vez por todas... Agardamos non ser nós as que acabemos dando cringe...

UN VERÁN PARA ESCOITAR HISTORIAS

Chega o remate do curso e, con el, unha oportunidade perfecta para levar a lectura máis alá das páxinas. O alumnado de Proxecto Competencial de 1ºA e 1ºB da ESO preparou xunto co seu profe Roberto estes audiocontos, froito do seu traballo, da súa creatividade e da súa ilusión por compartir historias.

Convidámosvos a poñer os auriculares, buscar un recuncho tranquilo e deixarvos levar por estas narracións. Porque as boas historias tamén se poden escoitar... e o verán é un momento perfecto para facelo.

Desexámosvos unhas moi felices vacacións e agardamos que estes audiocontos vos acompañen nalgún intre destes días de descanso.

Feliz verán e felices lecturas... tamén cos oídos!

Podedes escoitar os audiocontos premendo AQUÍ.

ATA O CURSO QUE VÉN, LECTORAS E LECTORES!

Neste último día de clase puxemos o broche final ás actividades do Club de Lectura Ao pé da letra cun pequeno encontro na BiblioAntioquía.

Ao longo do curso, as nosas lectoras e lectores participaron con entusiasmo nas distintas propostas do club, compartindo lecturas, opinións e experiencias arredor dos libros. Como recoñecemento á súa implicación e compromiso, fixémoslles entrega dun diploma e dun pequeno agasallo que lles servirá para lembrar os bos momentos vividos durante este ano.

Foi unha ocasión especial para celebrar todo o aprendido, as historias descubertas e os momentos compartidos na biblioteca. Queremos agradecer a cada participante a súa ilusión, curiosidade e ganas de ler, que son as que dan vida ao noso club de lectura.

Despedímonos ata o vindeiro curso, desexando que o verán veña cargado de novas lecturas, aventuras e descubrimentos entre as páxinas dos libros.

Grazas por formar parte de Ao pé da letra!

O ALUMNADO DE "AO PÉ DA LETRA" CONVÉRTESE EN CREADOR DE BANDA DESEÑADA

Na última reunión do Club de Lectura Ao pé da letra da BiblioAntioquía, o alumnado achegouse ao mundo da banda deseñada a través dunha selección de lecturas procedentes principalmente do xornal O Papagaio. As historias, contadas mediante a combinación de texto e imaxe, permitiron descubrir diferentes formas de narrar e expresarse, ao tempo que gozaban dunha lectura amena e atractiva.

Despois de comentar as obras lidas e analizar algúns dos recursos propios da banda deseñada, chegou o momento de poñer en práctica todo o aprendido. O alumnado converteuse en guionista e ilustrador, creando as súas propias historietas con moita imaxinación, humor e creatividade.

O resultado deste traballo pode verse estes días na biblioteca do centro, onde están expostas as diferentes creacións. A mostra é unha excelente oportunidade para coñecer o talento do noso alumnado e comprobar como a lectura pode servir de inspiración para crear novas historias.

Parabéns a todas e todos os participantes polo seu esforzo e pola calidade dos traballos realizados! Animámosvos a achegarvos á biblioteca para gozar desta exposición.

DÍA MUNDIAL DO MEDIO AMBIENTE: COIDEMOS O PLANETA

Esta semana, coincidindo coa celebración do Día Mundial do Medio Ambiente, dedicamos a nosa sesión de Hora de Ler a reflexionar sobre os desafíos ambientais que afronta o noso planeta e sobre o papel que cada persoa pode desempeñar para contribuír a un futuro máis sostible.

 

Ao longo da lectura, descubrimos como os efectos do cambio climático xa forman parte da nosa realidade: os incendios forestais cada vez máis difíciles de controlar, as vagas de calor, as inundacións, a contaminación dos mares ou a aparición dos chamados refuxiados climáticos. Tamén analizamos como moitas das nosas accións cotiás teñen un impacto directo sobre o medio ambiente. 

Pero a lectura non se centrou só nos problemas. Tamén nos mostrou que existen moitas maneiras de pasar á acción: utilizar medios de transporte máis sostibles, reducir o consumo de enerxía, apostar por unha alimentación con máis produtos vexetais, consumir de forma responsable ou facer escoitar a nosa voz para impulsar cambios positivos. 

A sesión rematou cun pequeno debate no que o alumnado compartiu as súas opinións sobre cuestións como a concienciación ambiental da súa xeración, os hábitos contaminantes máis normalizados e os cambios que cada quen podería incorporar na súa vida diaria para coidar mellor do planeta.

 

PROFESORAS E ALUMNADO COMPARTEN A LECTURA DE “COMERÁS FLORES” NA ÚLTIMA REUNIÓN DE “AO PÉ DA LETRA”

 

A semana pasada reuniuse, por última vez neste curso, o club de lectura de adultas “Ao pé da letra”. Nesta ocasión, as participantes comentaron “Comerás flores”, a ópera prima da autora marinense Lucía Solla Sobral, unha novela que está dando moito que falar e que aborda cuestións tan delicadas como as relacións desiguais ou a violencia psicolóxica dentro da parella.

Esta sesión foi especialmente enriquecedora, xa que, ademais das profesoras que adoitan participar nestes encontros, uníronse tamén dous alumnos de 1.º de Bacharelato que leron a obra na materia de Lingua Galega e Literatura.

Profesoras e alumnado compartiron impresións sobre unha novela que, en xeral, gustou moito polo seu estilo fresco e accesible, así como pola maneira en que trata temas universais que interpelan a calquera: o amor, a morte, a amizade ou a identidade.

Sen dúbida, "Comerás flores" é unha excelente recomendación para quen aínda non escolleu a súa primeira lectura deste verán.

UNHA LECTURA PARA DESCUBRIR O FASCINANTE MUNDO DAS ABELLAS

Nesta semana, na nosa actividade da Hora de Ler, achegámonos ao sorprendente universo das abellas a través dun texto cheo de curiosidades e informacións moi interesantes sobre estes pequenos insectos tan importantes para a vida no planeta e que celebran o seu Día cada 20 de maio.

Aprendemos que as abellas son moito máis ca simples produtoras de mel: son fundamentais para a polinización de milleiros de plantas e cultivos, contribuíndo directamente á biodiversidade e á alimentación humana. Tamén descubrimos datos sorprendentes, como que teñen cinco ollos, que se comunican mediante danzas ou que poden recoñecer rostros humanos.

Entre as curiosidades que máis nos chamaron a atención estiveron a capacidade das abellas para producir propóleo, a incrible organización da colmea e o feito de que unha soa raíña poida chegar a poñer ata 1.500 ovos ao día.

A lectura rematou cun pequeno debate no que reflexionamos sobre a importancia destes insectos e sobre as consecuencias que tería a súa desaparición. As conclusións foron claras: protexer as abellas significa protexer tamén os ecosistemas e a nosa propia supervivencia.

Desde a biblioteca seguimos apostando por lecturas que nos axudan a comprender mellor o mundo que nos rodea e a tomar conciencia da necesidade de coidar a natureza.

XINCANA DAS LETRAS GALEGAS 2026: DESCUBRINDO A BEGOÑA

Con motivo da celebración do Día das Letras Galegas 2026, o alumnado de 2.º da ESO participou nunha divertida xincana literaria dedicada á escritora e xornalista Begoña Caamaño e coordinada polo equipo de Dinamización lingüística.

A actividade desenvolveuse a partir da exposición instalada no centro, na que os equipos debían localizar información sobre a autora para resolver un Pasapalabra. Mais non era tan sinxelo! Para conseguir cada nova tarxeta coas definicións, os grupos tiñan que superar diferentes probas e retos, convertendo a aprendizaxe en todo un xogo de investigación e cooperación.

Durante a clase de Galego, os corredores e as aulas enchéronse de alumnado buscando pistas, lendo con atención os paneis expositivos, debatendo respostas e colaborando para avanzar na competición. O traballo en equipo, a comprensión lectora e a capacidade de observación foron fundamentais para completar a folla de control e acadar a maior puntuación posible.

A actividade permitiulles coñecer mellor a figura de Begoña Caamaño, unha das voces máis destacadas da literatura galega contemporánea, ao tempo que se achegaban á súa obra dunha maneira dinámica e participativa.

Como complemento á xincana, tamén descubriron o libro "Begoña Caamaño para crianzas", escrito por Xosé Tomás, unha obra que achega a vida e o legado da autora ás novas xeracións dun xeito atractivo e accesible.

É de xustiza felicitar a todo o alumnado pola súa implicación, entusiasmo e espírito colaborativo. Foi unha excelente oportunidade para celebrar as nosas letras e descubrir, xogando, a riqueza da literatura galega.

BEGOÑA CAAMAÑO: DARLLES VOZ ÁS MULLERES DOS MITOS

Na nosa Hora de Ler deste Día das Letras Galegas achegámonos á figura de Begoña Caamaño, autora homenaxeada neste 2026, a través dun percorrido pola súa vida e pola súa obra.

Xornalista, escritora e activista, Begoña Caamaño destacou por reinterpretar os grandes mitos clásicos desde unha perspectiva feminista, dándolles protagonismo ás mulleres que durante séculos quedaron relegadas a un segundo plano.

Durante a actividade descubrimos as súas novelas:

• Circe ou o pracer azul, onde Penélope e Circe intercambian cartas e comparten as súas visións sobre Ulises, o amor, a liberdade e o papel das mulleres.

• Morgana en Esmelle, unha revisión da lenda artúrica que nos presenta unha Morgana moi distinta da imaxe tradicional da “meiga malvada”.

A lectura de fragmentos das obras serviunos para reflexionar sobre cuestións moi actuais: quen conta as historias, como se representan as mulleres nos relatos e por que certos personaxes femininos foron vistos historicamente como perigosos ou rebeldes.

Tamén houbo tempo para o debate e para pensar en como a literatura pode cuestionar ideas da sociedade e ofrecer novas miradas sobre os clásicos.

Con esta sesión quixemos celebrar non só a literatura galega, senón tamén o poder das historias para recuperar voces esquecidas e abrir espazos de reflexión.

Feliz Día das Letras Galegas e felices lecturas!

A VOZ DE BEGOÑA CAAMAÑO: VIDA, MEMORIA E LEGADO

Co gallo da celebración do Día das Letras Galegas 2026, os profes Lisardo e Roberto, dos departamentos de Xeografía e Historia e Música, respectivamete, agasállannos cunha fermosa semblanza sonora sobre a vida e a obra da autora homenaxeada este ano, Begoña Caamaño. A través deste podcast, achegámonos á traxectoria dunha muller comprometida coa cultura, coa lingua galega e coa defensa das voces femininas na literatura e na sociedade.

Con música, palabras e sensibilidade, este traballo convídanos a descubrir o legado dunha autora imprescindible das nosas letras. Agardamos que o desfrutedes!

Feliz Día das Letras Galegas!!

HORA DE LER: AS MATEMÁTICAS TAMÉN TEÑEN NOME DE MULLERES

Na nosa sesión da Hora de Ler desta semana achegámonos á historia de numerosas mulleres que deixaron unha pegada inesquecible no mundo das matemáticas. A lectura permitiunos descubrir que, malia as dificultades e os prexuízos que sufriron ao longo da historia, moitas científicas lograron facer contribucións fundamentais para o avance do coñecemento.

Comezamos coñecendo a figura de Maryam Mirzakhani, matemática iraniana e primeira muller en recibir a prestixiosa Medalla Fields, motivo polo que o 12 de maio se celebra o Día Internacional das Mulleres Matemáticas.

A continuación fixemos un percorrido por diferentes épocas e descubrimos a vida e o traballo de matemáticas tan destacadas como Hipatia de Alexandría, pioneira no estudo da xeometría e da astronomía; Sophie Germain, que tivo que ocultar a súa identidade para poder estudar; Ada Lovelace, considerada a primeira programadora da historia; ou Katherine Johnson, cuxos cálculos foron decisivos para as misións espaciais da NASA.

Esta lectura serviunos para reflexionar sobre a importancia de facer visibles as achegas das mulleres á ciencia e para comprender que o talento non entende de sexo. Tamén nos permitiu valorar o esforzo e a perseveranza de todas aquelas investigadoras que abriron camiño para as xeracións futuras.

Desde a biblioteca queremos sumarnos aos obxectivos desta conmemoración: visibilizar as contribucións das mulleres nas matemáticas, inspirar ás novas xeracións e promover a igualdade de oportunidades no ámbito científico. 

O DEPORTE TAMÉN SE LE: UNHA EXPOSICIÓN PARA MOVER CORPO... E MENTE

Na BiblioAntioquía seguimos descubrindo que a lectura pode levarnos a lugares inesperados. Desta vez, o deporte converteuse no gran protagonista dunha exposición que combina libros, valores, emocións e moita inspiración.

Desde o departamento de Educación Física, prepararon unha mostra bibliográfica na que o alumnado pode atopar lecturas relacionadas co fútbol, o atletismo, o boxeo, a superación persoal ou as historias de grandes deportistas. Pero esta exposición vai moito máis alá dos resultados e das medallas.

Porque o deporte fala de esforzo, identidade, traballo en equipo, medos, constancia e aprendizaxe. E os libros axúdannos precisamente a entender todo iso.

Na selección hai títulos para diferentes gustos e idades: biografías de deportistas coñecidos, novelas xuvenís, lecturas motivadoras e incluso materiais para aprender inglés a través do deporte. Ademais, acompañamos a exposición con elementos visuais e deportivos que fan o espazo máis atractivo e dinámico.

Con esta proposta queremos animar ao alumnado a achegarse á lectura desde outros intereses e demostrar que calquera paixón pode ser unha porta de entrada aos libros.

1 DE MAIO: DEREITOS QUE NACEN DA LOITA

 A semana pasada, na nosa Hora de Ler, achegámonos ao significado do Día Internacional dos Traballadores e Traballadoras, descubrindo que non é só un día festivo, senón tamén unha xornada de memoria e reivindicación.

A través do texto que lemos, o alumnado coñeceu como moitos dos dereitos que hoxe damos por feitos, como a xornada de 8 horas, o descanso semanal ou a prohibición do traballo infantil, foron conquistados tras anos de loita e esforzo colectivo.

Especialmente impactante foi descubrir a realidade do traballo infantil durante a Revolución Industrial, cando nenos e nenas da nosa mesma idade traballaban en condicións moi duras, así como comprobar que, por desgraza, esta situación aínda existe hoxe en moitas partes do mundo.

A lectura tamén nos levou a reflexionar sobre a importancia da escola, do tempo de lecer e dos dereitos que temos, lembrando que non son un privilexio casual, senón unha conquista que debemos valorar e defender.

Rematamos cun pequeno debate no que o alumnado compartiu as súas ideas e preguntas sobre o mundo do traballo, o consumo responsable e as desigualdades actuais.

Porque ler tamén é entender o mundo… e cuestionalo.

MEMORIA DO TRABALLO: OFICIOS QUE NON DEBEMOS ESQUECER

Con motivo da celebración do 1 de maio, Día do Traballo, o equipo da BiblioAntioquía organizou unha pequena exposición dedicada aos oficios tradicionais, moitos deles xa desaparecidos ou en risco de caer no esquecemento.

Ao longo do percorrido, pódense descubrir profesións como as lavandeiras, o barquilleiro, o sereno, o pregoeiro ou o carboeiro, así como coñecer o papel das amas de cría e outros traballos fundamentais noutra época. Ademais, tamén quixemos dar visibilidade a algúns oficios artesanais que aínda perviven hoxe, como as castañeiras, as palilleiras ou a confección de redes.

Esta exposición é unha homenaxe ás persoas que, co seu esforzo diario, sostiveron a vida das comunidades e deixaron unha pegada na nosa historia e na nosa cultura.

Unha oportunidade para reflexionar sobre como mudou o mundo do traballo… e sobre a importancia de non esquecer de onde vimos.

Podedes visitala no vestíbulo do centro (na cortiza ao lado do ascensor), durante estes días.

Agardámosvos!

QUE FIXEMOS NA BIBLIOANTIOQUÍA NO DÍA DO LIBRO? POIS LER!

Na BiblioAntioquía non se nos ocorreu mellor maneira de celebrar o Día Internacional do Libro ca lendo. Así que, neste último gran día de celebración do noso Mes do Libro, xuntámonos uns cantos e unhas cantas na biblioteca para ler. Foi en forma de micro aberto, no que quen quixo se achegou para lernos un fragmento da súa obra favorita.

Desta volta, abrimos unha pequena ventá a este acto sinxelo pero efectivo que queremos compartir convosco a través deste vídeo. Grazas por vernos e feliz Día do Libro!

CREATIVIDADE ENTRE LIBROS: OS NOSOS MARCAPÁXINAS

Neste mes do Libro, a nosa BiblioAntioquía encheuse de cor, creatividade e moito amor polos libros grazas aos marcapáxinas elaborados polo alumnado. 

Durante os obradoiros, a rapazada deu renda solta á súa imaxinación e o resultado non pode ser máis bonito: deseños cheos de cores, personaxes, paisaxes, mensaxes lectoras… e, sobre todo, moitísima ilusión. Cada marcapáxinas é único e reflicte a personalidade e o gusto pola lectura de quen o creou.

Aquí vos deixamos unha pequena mostra de todo o talento que temos no centro. Porque ler tamén é crear… e crear tamén é unha forma de ler o mundo. 

Parabéns a todos e todas polo traballo tan marabilloso! 

COÑECE AS PERSOAS GAÑADORAS DO MES DO LIBRO DA BIBLIOANTIOQUÍA

Velaquí vai unha de gañadores e gañadoras dos concursos que puxemos en marcha neste fantástico mes do Libro na BiblioAntioquía.

Esta semana fixemos entrega de algúns agasallos para os creadores e creadoras dos marcapáxinas máis chulos elaborados nos obradoiros da biblio. Recibiron este recoñecemento:
• Gael de 1º ESO B
• Aitana de 1º ESO C
• Aldara de 2º ESO A

Tampouco nos esquecemos das maiores expertas en literatura do Cidade de Antioquía. Estas fantásticas mozas demostraron, coas súas respostas máis que acertadas no noso rosco do LiteraTour, que son unhas verdadeiras sabias no que respecta ao mundo dos libros.

Na categoría de alumnado, a campioa foi:
• Noa de 1º ESO B

E na categoría de adultos:

• A nosa marabillosa conserxe Paula!

Parabéns a todas as nosas premiadas!

BOOK DAY NA BIBLIOANTIOQUÍA: LER, XOGAR E DESCUBRIR

Co gallo do Día Internacional do Libro, e dentro das actividades organizadas pola BiblioAntioquía para este mes tan especial, o alumnado de 1º ESO puido desfrutar dunha xornada moi entretida na biblioteca: o Book Day!

Onte, durante a clase de inglés e guiados pola profe Belén, a rapazada foi superando unha serie de retos relacionados cos libros. Estas probas axudáronos a familiarizarse co sistema de Clasificación Decimal Universal, que establece a orde nas bibliotecas de todo o mundo, a refrescar habilidades como a busca rápida en dicionarios en papel e tamén a fixarse un pouco máis nas exposicións e recursos da nosa BiblioAntioquía.